జైలు నుంచి ఎమ్మెల్యే అక్బరుద్దీన్ విడుదల

 ఎంఐఎం శాసనసభాపక్ష నేత అక్బరుద్దీన్ ఓవైసీ శనివారం సాయంత్రం 5.11 గంటలకు బెయిల్‌పై బయటకొచ్చారు. వివాదాస్పద వ్యాఖ్యల కేసులో అక్బరుద్దీన్ ఓవైసీ ఏ-1 నిందితుడిగా ఉన్నారు. ఆయనపై ఆదిలాబాద్ జిల్లా నిర్మల్ కోర్టులో ఏడు కేసులు నమోదైన సంగతి తెలిసిందే. ఆయా కేసుల్లో శుక్రవారం 437 సెక్షన్ కింద ఆయన బెయిల్ పొందారు. జిల్లా ప్రధాన న్యాయమూర్తి ఏ.వెంకటేశ్వరరెడ్డి బెయిల్ మంజూరు చేశారు. ఎంఐఎం మద్దతుదారులు శనివారం జైలు ప్రాంతంలో స్వీట్లు పంచిపెట్టి టపాసులు కాల్చారు. ఎంఐఎం ఎమ్మెల్యే అఫ్సర్‌ఖాన్, అక్బరుద్దీన్ వ్యక్తిగత వైద్యుడు మజారుద్దీన్ అలీఖాన్, ఎంఎల్‌సీ అల్తాప్ హైదర్ రజీ, ఎంఐఎం జిల్లా నాయకుడు సిరాజ్‌ఖాద్రీ, పట్టణా«ధ్యక్షుడు ఫారూఖ్ అక్బరుద్దీన్ విడుదలయ్యే వరకు జైలు వద్దే ఉన్నారు. అక్బరుద్దీన్ విడుదల సందర్భంగా ఆదిలాబాద్ జిల్లా జైలు వద్ద పోలీసులు భారీ బందోబస్తు ఏర్పాటు చేశారు. అడిషనల్ ఎస్పీ కె.వి.కిషన్‌రావు ఆధ్వర్యంలో డీఎస్పీ కె.ఎం.మహేశ్వరరాజు భారీ బందోబస్తు ఏర్పాటు చేశారు. క్యూఆర్‌టీ(క్విక్ రియాక్షన్ టీం) బృందాలను రంగంలోకి దింపారు. రోప్ పార్టీలను ఏర్పాటు చేశారు. అవసరమున్న చోట బారికేడ్లు పెట్టారు.